Kemur Íslendingum verulega á óvart

TikTok-myndband af Kanadamanninum Aidan Simardone í viðtali við Ólaf Jóhann Steinsson hefur farið eins og eldur um sinu á samfélagsmiðlinum síðustu daga en hátt í 50.000 hafa horft á myndbandið.

Ólafur tók viðtal við hann af handahófi á götum Toronto-borgar í Kanada og var viðfangsefnið „almenn vitneskja“ um Ísland. Ekki vissi Ólafur að Aidan var greinilega drekkhlaðinn vitneskju um Ísland.

Aiden vissi staðsetningu Íslands, fjölda Íslendinga (nánast upp á hár), höfuðborgina, að við værum herlaus og fleira. Ólafur skaut þá inn setningu í miðju viðtali:

„Við erum bara komnir í Útsvar hérna.“

Alltaf elskað landafræði

Fréttamiðillinn Toronto Life hefur nú tekið manninn tali um nýfengna frægð sína þar sem fram kemur að Aiden hefur alla sína tíð verið mikill áhugamaður um landafræði og kynnt sér hin ýmsu lönd.

„Ég held að ég hafi enga sérstaka sérþekkingu á Íslandi, en það er land sem ég hef varið nokkrum tíma í að læra um. Ég ætti að segja að þetta „augnablik“ var næstum 30 ár í mótun.

Frá því ég man eftir mér hef ég elskað landafræði,“ segir hann.

„Þegar aðrir krakkar lásu Harry Potter las ég kortabækur, alfræðirit og bækur um fána.“

Aiden sá ummæli frá nokkrum Íslendingum undir færslunni og ákvað að þýða þau yfir á ensku.

„Einhver fjöldi skrifaði: „WTF? Ég veit þetta ekki einu sinni“, eða: „Hvernig veit Kanadamaður um þetta?“

• 1 blogg um fréttina

Bloggað um fréttina

• Ómar Ragnarsson: Eyjafjallajökull kynnti Ísland öllu öðru fremur fyrir heimsbyggðinni.