Phil Donahue látinn

Bandaríski sjónvarpsmaðurinn Phil Donahue er látinn 88 ára að aldri. Hann lést á Manhattan síðastliðinn sunnudag eftir langvarandi veikindi.

„The Phil Donahue Show“ fór fyrst í loftið árið 1967 og var það fyrsti spjallþátturinn í bandarísku sjónvarpi, þar sem áhorfendur voru í salnum meðan hann var tekinn upp, og varð það fyrirmynd annarra slíkra spjallþátta sem fluttir voru um miðjan dag. 

Donahue tók oft og tíðum á viðkvæmum málefnum eins og fóstureyðingum, trúmálum og kynlífi, sem var nýjung á þeim tíma. Síðar tóku aðrir þekktir spjallþáttastjórnendur upp sama snið, þar á meðal Oprah Winfrey.

Donahue hlaut fjölda Emmy verðlauna fyrir þætti sína, en síðasti spjallþáttur Donahues fór í loftið í september 1996. 

Donahue kvæntist tvisvar. Fyrri kona hans var Margaret Cooney og voru þau gift frá 1958-1975. Áttu þau saman fimm börn og lifa fjögur þeirra föður sinn. Árið 1980 kvæntist Donahue leikkonunni Marlo Thomas. Þau kynntust við tökur á þætti Donahues, og var það að sögn beggja ást við fyrstu sýn.

• 1 blogg um fréttina

Bloggað um fréttina

• Ingólfur Sigurðsson: Stöðnuð menning