Snjóblinda Ragnars þykir ein sú besta

Spennusagnahöfundurinn Ragnar Jónasson er í góðum hópi þekktra höfunda á nýjum lista yfir bestu norrænu glæpasögurnar sem birtur var í Lundúnablaðinu The Standard í vikunni.

Bók Ragnars Snjóblinda þykir ein af bestu norrænu glæpasögunum sem skrifaðar hafa verið, samkvæmt umræddum lista sem tekinn var saman af bókmenntafræðingnum Saskiu Kemsley. Meðal annarra höfunda sem eiga verk á listanum eru Stieg Larsson, Jo Nesbø og Sjöwall og Wahlöö.

Í grein Kemsley í The Standard segir meðal annars að hafi einhver bókmenntagrein endurvakið trú hennar á mátt veðurlýsinga í frásögnum sé það norræna glæpasagan. Hún rekur að umrædd bókmenntagrein hafi orðið til á sjöunda áratug síðustu aldar með sögum Sjöwalls og Wahlöös en vinsældir þessara myrku bóka hafi vaxið á tíunda áratugnum og í upphafi nýrrar aldar með höfundum á borð við Henning Mankell, Jo Nesbø, Anders Bodelsen og Stieg Larsson.

Með Stieg Larsson og Jo Nesbø

Augljóst sé að sögusvið bókanna henti glæpasagnaforminu vel því í þeim sé mikill kuldi, snjór og frost. Ef svo ólíklega vilji til að einhver sagan hefjist í kæfandi sumarhita líði ekki á löngu þar til það breytist í myrkur, hið innra jafnt sem ytra. Vinsældir norrænna glæpasagna megi að einhverju leyti rekja til þess að þær stangist á við þá viðteknu skoðun að samfélögin á Norðurlöndunum séu friðsæl og örugg.

Alls velur Kemsley 11 bækur sem bestu norrrænu glæpasögur allra tíma en fyrir utan Snjóblindu eru það m.a. Karlar sem hata konur eftir Stieg Larsson, Leðurblakan eftir Jo Nesbø, Morðið á ferjunni eftir Sjöwall og Wahlöö, Ósköp venjuleg fjölskylda eftir M. T. Edvardsson, Lesið í snjóinn eftir Peter Høeg og Ísprinsessan eftir Camillu Läckberg.