Helmingur pirraður yfir nágrönnunum

Meira en helmingur íbúa í Osló lætur nágranna sína fara í taugarnar á sér, að því er ný könnun landssambands byggingarsamvinnufélaga í Noregi leiðir í ljós.

Hávær tónlist og annar hávaði frá nágrönnum er það sem mest angrar Norðmenn, en 28% sögðust ergja sig yfir honum. Rusl og óreiða er næstalgengasta umkvörtunarefnið og angrar það 16% íbúanna en 10% sögðu að matarlykt úr annarra manna húsakynnum færi í taugarnar á sér, að því er fram kemur á fréttavef Aftenposten.

Ungt fólk pirraðra

Í ljós kom að ungt fólk, þ.e. fólk undir þrítugu, er gjarnara á að verða pirrað á nágrönnum sínum en þeir sem eldri eru og könnun leiddi jafnframt í ljós að íbúar í Osló eru mun pirraðri en fólk sem býr annars staðar í Noregi.