Nakinn ferðamaður veldur uppnámi

Bandarískur ferðamaður sem spókaði sig kviknakinn í miðborg Nürnberg í fyrrakvöld olli nokkru uppnámi, en þegar lögregla hafði afskipti af honum sagðist hann hafa haldið að í Þýskalandi þætti ekkert athugavert við að vera nakinn á almannafæri.

„Það hefur vissulega verið óvenju heitt hérna að undanförnu, en þetta var nú of langt gengið,“ sagði talsmaður lögreglunnar í Nürnberg. Í Þýskalandi er heimilt að liggja nakinn í sólbaði í almenningsgörðum, en borgarbúum sem mættu nakta Bandaríkjamanninum á förnum vegi var nóg boðið.

Ferðamaðurinn, sem er 41 árs, var ekki undir áhrifum neinna vímugjafa. Hann hélt á fötunum sínum í poka er lögreglan stöðvaði hann. Var honum gert að klæða sig og greiða 200 evrur í sekt fyrir ósæmilega hegðun.

• 2 blogg um fréttina

Bloggað um fréttina

• Gerða Kristjáns: Hahaha kanakjáni
• Gísli Foster Hjartarson: Vertu velkominn til Íslands vinur