Sænskir froskar syngja best

Sænskir froskar fóru með sigur af hólmi í söngkeppni evrópskra froska, sem fram fór í fyrsta skipti á dögunum. Danskir froskar urðu í öðru sæti og þýskir í því þriðja en froskarnir í Lettlandi þóttu lakastir.

Sagt er frá þessu í nýjasta Bændablaðinu. Þar kemur fram, að keppnin fór fram tvö kvöld en síðara kvöldið var veður svo slæmt í þremur löndum, að froskarnir þar þögðu þunnu hljóði.

Keppnin fór þannig fram, að áheyrendur söfnuðust saman í nágrenni staða, þar sem froskarnir halda sig, og hlýddu á þá. Þeir gátu einnig fylgst með hljóðum froska í öðrum löndum gegnum netið. Síðan voru greidd atkvæði og stóðu froskar í Svíþjóð uppi sem öruggir sigurvegarar.

Bændablaðið segir að þessi keppni hafi verið liður í sérstöku átaksverkefni sem nýtur styrkja frá Evrópusambandinu. Tilgangurinn sé að styrkja og viðhalda stofni evrópskra söngfroska sem hefur látið á sjá vegna ágangs á votlendi í álfunni.

• 1 blogg um fréttina

Bloggað um fréttina

• Gísli Foster Hjartarson: Vil beina úts. að ári