Nýr pylsuátsmeistari krýndur

Nýr Bandaríkjameistari í pylsuáti var krýndur í úrslitum landskeppninnar í þessari óvenjulegu íþrótt í New York í dag. Bandaríkjamaðurinn Joey Chestnut bar þar sigurorð af Japananum Takeru „flóðbylgju" Kobayshi, sem hafði unnið keppnina sex ár í röð. Talið er að um 50 þúsund manns hafi fylgst með keppninni en sigurvegarinn át 66 pylsur í brauði á 12 mínútum sem mun vera heimsmet.

Litlu munaði að Kobayashi hætti við þátttöku en hann þjáðist af gigt í kjálka og einnig var endajaxl dreginn úr honum í vikunni. Hann náði þó að skófla í sig 63 pylsum.

Pylsuátskeppnin, sem kennd er við Nathan's Famous Hot Dog, hefur verið haldin á Coney Island árlega frá árinu 1916 og nýtur sívaxandi vinsælda. Flestir keppendur nota nú svonefnda Salómonstækni, sem Kobayashi kom fyrstur fram með, en hún byggir á því, að brjóta pylsurnar saman og stinga þeim þannig upp í sig og borða síðan brauðið eftir að hafa dýft því í vatn.

Eina raunverulega reglan í keppninni er að forðast að kasta pylsunum upp en viðurlög við því er tafarlaus frávísun.

Takeru Kobayashi var meiddur í kjálka og gat því ekki beitt sér sem skyldi. AP

• 1 blogg um fréttina

Bloggað um fréttina

• Jenný Anna Baldursdóttir: AUMINGJA TAKERU GREYIÐ