Umhverfisvænn vindgangur

Þegar kengúrur leysa vind losa þær ekki metangas út í andrúmsloftið líkt og jórturdýr gera. Nú vilja vísindamenn koma þarmaflóru kengúra fyrir í kúm og sauðfé.

Fram kemur í Berlingske Tidende, að meltingarkerfi kengúra leysi út acetat, einskonar salt, í stað metangass sem kemur frá kúm og sauðfé og í litlum mæli frá fólki.

Haft er eftir Athol Klieve, vísindamanni í Queensland í Ástralíu, að þar í landi megi rekja um 14% af losun metangass út í andrúmsloftið til kúa og kinda. Þetta hlutfall sé enn hærra í Nýja-Sjálandi, þar sem landbúnaður er öflugur.

Metangas hefur mun meiri áhrif á andrúmsloftið en koldíoxíð en það myndast í votlendi, við bruna kolefna og einnig í þörmum dýra og manna. Þar er hlutur jórturdýra stærstur vegna þess hve melting fæðunnar tekur langan tíma.

Í þarmaflóru kengúara finnst ekki bakterían archaea, sem framleiðir metangas hjá kúm og sauðfé. Að sögn Klieve hafa kengururnar þróast með öðrum hætti en aðrar dýrategundir í milljónir ára og þarmaflóra þeirra er allt öðruvísi en annarra dýra. Þess vegna leysa kengúrur út salt í stað þess að leysa vind og þær nýta fæðuna einnig mun betur en önnur dýr.

Vísindamenn segja, að það muni taka um þrjú ár að einangra virku bakteríuna í kengúrum og þá sé hægt að koma henni fyrir í kúm og sauðfé. 

• 2 blogg um fréttina

Bloggað um fréttina

• Helgi Jónsson: Hvað skyldu
• Riddarinn : Skyldi þá ekki verða úr þessu mjólkurhristingur?