Flugfreyjur á bikíní reita Spánverja til reiði

Spænsk neytendasamtök fordæmdu í dag dagatal sem írska lággjaldaflugfélagið Ryanair hefur gefið út. Á dagatalinu, sem flugfélagið lýsir sem „heitasta" dagatalinu 2008, eru myndir af flugfreyjum á bikíní.

Dagatalið var sett í sölu um borð í vélum Ryanair þann 17. nóvember og á netinu en allur ágóði af sölunni rennur til góðgerðarmála. Á vef Ryanair er haft eftir einum yfirmanni Ryanair að stórkostlegir flugliðar Ryanair hiti heldur betur upp flugstjórnarklefann. 

Samtökin Facua, sem lögðu fram formlega kvörtun til jafnréttissviðs ráðuneytis vinnumála og Neytendastofu, segja dagatalið brjóta gegn lögum frá 1988 sem leggja bann við því að auglýsingar misbjóði fólki. Í yfirlýsingu Facua kemur fram að dagatalið misbjóði vinnandi konum almennt og þá sér í lagi konum sem starfa við flug. Á dagatalinu séu sýndar staðlaðar ímyndir flugfreyja og brjóti gegn öllu sem samtökin hafi barist gegn áratugum saman.

Í september reitti Ryanair marga Spánverja til reiði með því að birta auglýsingu þar sem hæðst var að ákvörðun forsætisráðherra Spánar,  Jose Luis Zapatero, um að gefa foreldrum allra nýbura 2.500 evrur. Síðar dró Ryanair auglýsinguna til baka.   

• 2 blogg um fréttina

Bloggað um fréttina

• Snorri Bergz: Öfga-femínistar á Íslandi hljóta að mótmæla þessu
• Heimir Tómasson: Flugfreyjur og bikini - ekki alltaf góð blanda