Káfaði á jólasveininum

Það er ekkert sældarlíf að vera jólasveinn og því fékk Sveinki að kynnast þegar hann var staddur í Danbury verslunarmiðstöðinni í Connecticut í Bandaríkjunum. Jóli var bandarískri venju samkvæmt í sæti sínu að ræða við börn og taka við óskum þeirra. Settist þá einn fullorðinn óþekktarormur, Sandrama Lamy, í kjöltu sveinka og fór að káfa á honum.

Konan þessi er 33 ára og býr í Danbury. Hún hefur nú verið kærð fyrir kynferðislega áreitni og þarf að mæta fyrir dómstóla 3. janúar næstkomandi. Lögreglumenn voru ekki lengi að finna Lamy eftir glæpinn þar sem hún var á hækjum og auðvelt að koma auga á hana í mannfjöldanum. Lamy segist saklaus af káfinu. Jólasveinninn er 65 ára og segist afar leiður yfir öllu saman því börnin hafi beðið í röðum eftir að fá að spjalla við hann.