Jólaólæti

Hópur jólasveina, sem virðast eitthvað skyldir gömlu íslensku jólasveinunum, gekk berserksgang í kvikmyndahúsi í borginni Christchurch á Nýja-Sjálandi í gær.

Lögregla segir að 50 menn í jólasveinabúningum hafi vaðið um kvikmyndahúsið, bölvandi og ragnandi, hrætt bíógesti og skemmt hluti. Það tók hópinn aðeins 20 sekúndur að setja allt á annan endann. Grunur leikur á að um hafi verið að ræða háskólastúdenta.

Myndir náðust af jólasveinunum á öryggismyndavélar en lögreglan segir vonlaust að bera á þá kennsl.

Til að bæta gráu ofan á svart brutu jólasveinarnir brunaboða áður en þeir hurfu á brott og þurfti því að rýma alla sýningarsalina þar sem um 400 manns voru að horfa á kvikmyndir.

• 2 blogg um fréttina

Bloggað um fréttina

• Gísli Foster Hjartarson: Misjöfn er kímnigáfa manna!
• Jóhannes Ragnarsson: Byltingarsinnaðir jólasveinar