Maður festist í skorsteini

Ástralskir slökkviliðsmenn björguðu manni sem festist í skorsteini í meira en tíu tíma um jólin.

Lögreglan telur að maðurinn hafi ætlað að brjótast inn á Hótel í Alice Springs um miðnætti þegar hann festist.

Starfsfólk hótelsins fann manninn, sem er 21 árs, þegar það heyrði hann kveina morguninn eftir.

Slökkviliðsmenn og sjúkralið eyddu einum og hálfum klukkutíma í að frelsa manninn úr skorsteininum, en þurftu að lokum að fjarlægja arinn úr múrsteinum með múrsög og höggborvél,til þess að geta dregið manninn út.

Að sögn slökkviliðsfulltrúans Mark James hafði maðurinn verið fastur í um tíu tíma með hnén föst upp við bringuna. 

„Hann var eins og lirfa í lirfuhýði þegar við fundum hann. Hann var verulega kraminn.”  „Hann sagði ekki mikið þegar við náðum honum út.  Hann var aumur og leit út fyrir að skammast sín mikið,” sagði James.

Farið var með manninn á sjúkrahús í Alice Springs þar sem hann var með minniháttar meiðsl á fótleggjum og í baki, en hann verður svo yfirheyrður af lögreglu.