Andsetnir nemendur í Úganda

Yfir hundrað nemendur í skóla í Úganda voru andsetnir, að því er kemur fram í ríkisreknu úgönsku dagblaði.  Dagblaðið New Vision segir frá því að skólastjóri í barnaskóla í vestur-Úganda hafi lýst atviki þar eins og árás illra anda á börnin, sem urðu móðursjúk og létu öllum illum látum.

„Ástandið var slæmt og um hundrað nemendur trylltust.  Þau eltu kennara og aðra nemendur, hentu í þá steinum, og skelltu hurðum og gluggum," sagði skólastjóri skólans.

Skólastjórinn sagði svipað atvik hafa átt sér stað í fyrra og sagði kennara vera í öngum sínum yfir ástandinu.  Þeir hafi reynt að fullvissa foreldra um að í lagi væri að senda börnin í skólann og að sérstakar bænir hafi verið sagðar fyrir nemendurna.

Fram kemur í blaðinu að í fyrra voru fjórir íbúar í héraðinu handteknir fyrir að leggja álög á skólann.  Galdratrú er mjög algeng á sumum svæðum Úganda, sér í lagi á landsvæðum þar sem fólk er mjög trúað.

• 6 blogg um fréttina

Bloggað um fréttina

• Ásgrímur Hartmannsson: Hvað ætli þetta upplaup í þeim hefði verið kallað hér …
• Jóhannes Ragnarsson: Andsetnir græðgiskálfar
• Guðrún Emilía Guðnadóttir: Galdratrú Úganda.
• Steinn Hafliðason: Andsettnir mótmælendur
• Ársæll Níelsson: Andsetnir nemendur á Tálknafirði
• Þorsteinn Siglaugsson: Andsettir?