Orrustuflugmenn á Viagra?

Læknar á vegum ísraelska flughersins telja að til greina komi að láta orrustuflugmenn taka Viagra til að bæta frammistöðu þeirra - í loftinu, það er að segja.

Nýleg rannsókn sem ísraelskir læknar gerðu á fjallgöngumönnum í Afríku leiddi í ljós tengsl á milli lyfja við ristruflunum og bættrar frammistöðu í mikilli hæð, að því er ísraelska blaðið Yediot Aharonot greindi frá í dag.

Virka efnið í lyfjunum reyndist gera að verkum að fjallgöngumennirnir þurftu ekki eins mikið súrefni og ella, en súrefnisskortur í mikilli hæð getur leitt til þreytu og svima.

Þessar rannsóknarniðurstöður kveiktu þá hugmynd hjá herlæknunum að láta orrustuflugmenn hersins, sem þurfa að fljúga í allt að 50.000 feta hæð (15.000 metrum), samskonar lyf.

Orsök þessara áhrifa lyfsins mun vera sú, að súrefnisskortur leiðir til hækkaðs blóðþrýstings í lungunum en lyfið dregur úr þeim áhrifum.

• 4 blogg um fréttina

Bloggað um fréttina

• Ólafur Ragnarsson: Einbeiting kannske ekki alveg 100%
• hofy sig: Hvað með flugfreyjurnar?
• Frikkinn: Harðir í háloftunum.
• Nafni: Gírinn.