Stones-banni aflétt í Blackpool

Fyrir 44 árum héldu Rolling Stones tónleika í The Empress Ballroom í Blackpool sem enduðu í óeirðum og settu yfirvöld bæjarins hljómsveitina í ævilangt tónleikabann en því banni hefur nú verið aflétt.

1964 gengu 7 þúsund tónleikagestir berserksgang á tónleikunum í Blackpool og lögðu tónleikahöllina í rúst, rifu upp sæti, hentu flöskum og eyðilögðu píanó. 50 manns voru fluttir á sjúkrahús með margskonar meiðsl.

Nú segir á fréttavef BBC að  bæjarstjórnin hafi sent Stones bréf þar sem þeim er boðið að koma aftur.

Ári eftir Empress Ballroom tónleikana reyndu Stones að halda tónleika í annarri tónleikahöll en fengu ekki leyfi.

Forseti bæjarstjórnarinnar Peter Callow segist hafa beðið um að Stones yrði ritað bréf þar sem stæði: „Komdu aftur Mick, allt er fyrirgefið."

Hljómsveitin hefur ekki sent frá sér nein viðbrögð.

• 2 blogg um fréttina

Bloggað um fréttina

• Gísli Foster Hjartarson: Einhver dæmi héðan?
• Villi Asgeirsson: Til Íslands? Knopfler líka.