Mikil hátíðahöld munu fara fram vítt og breitt um Bandaríkin á morgun, 4. júlí, í tilefni þjóðhátíðardagsins. Til siðs er að skjóta upp flugeldum en ein rakettan, sem skotin verður upp í Indianapolis, verður ólík öllum öðrum. Í henni verður um hálf teskeið af ösku mannsins sem stjórnaði hátíðahöldum borgarinnar í 40 ár.
Meredith Smith dó í febrúar 74 ára að aldri. Hann hafði lengi vel verið í forystu hátíðanefndar borgarinnar og til að minnast hans ákváðu hátíðahaldarar, með samþykki fjölskyldu og vina, að láta ögn af ösku hans í síðustu rakettuna sem skotið verður upp. Mun þannig myndast lítil hvít rák á himni sem markar lok sýningarinnar.