Afengisbanni aflétt á Hyatt

Margra vikna áfengisbanni var aflétt og er áfengi á boðstólum á ný á fimm stjörnu Grand Hyatt hótelinu í Kaíró í Egyptalandi. Áfengi var bannað samkvæmt íslömskum boðum og bönnum en það var eigandi hótelsins sem setti bannið á í maí síðast liðinn.

Sheikh Ibrahim eigandi hótelsins sem er jafnframt meðlimur konungafjölskyldunnar í Sádí Arabíu hellti niður að sögn AFP fréttastofunnar innihaldi úr um það bil 2400 áfengisflöskum að verðmæti 24,5 milljónir íslenskra króna eftir að hann ákvað að banna áfengi á hótelinu.

Egypsk yfirvöld sem standa vörð um ferðamannaiðnaðinn hótuðu þá að lækka hótelið í tign sem nemur tveimur stjörnum samkvæmt reglum um slíka stjörnugjöf.

Eftir langar og strangar samningaviðræður hefur verið komist að þeirri niðurstöðu að áfengi verði á boðstólum á hótelbarnum á 41. hæð hótelsins þar sem einnig er að finna veitingastað á útsýnisgólfi sem snýst.

Áfengi er áfram bannvara á öðrum veitingastöðum hótelsins sem munu vera 11 talsins og einnig er það ekki sett inn á smábari sem er að finna á 716 herbergjum og svítum hótelsins en hægt er að panta það í gegnum herbergjaþjónustuna.

• 1 blogg um fréttina

Bloggað um fréttina

• Níels A. Ársælsson.: Öl alda sonum