Bannað að auglýsa „lífrænt ræktaðar" sígarettur

Dómstóll í Hamborg í Þýskalandi hefur komist að þeirri niðurstöðu, að bandarískt tóbaksfyrirtæki megi ekki auglýsa tóbak undir yfirskriftinni „lífrænt ræktað" vegna þess að slíkt sé misvísandi og feli í sér brot á samkeppnislögum. 

Fyrirtækið Santa Fe Natural Tobacco hefur selt sígarettur undir yfirskriftinni: Lífrækt ræktaðar filtersígarettur. Talsmaður dómstólsins segir, að hugtakið „lífrækt ræktað" gefi til kynna, að slíkar sígarettur séu ekki skaðlegar og því brjóti auglýsingarnar í bága bæði við tóbaksvarnalög og samkeppnislög. 

Fyrirtækið auglýsir í Þýskalandi, að sígaretturnar séu búnar til úr 100% lífrænt ræktuðu tóbaki og notaður sé pappír, sem brotnar niður í náttúrunni í samræmi við reglur Evrópusambandsins.

Santa Fe Natural Tobacco er hluti af bandaríska stórfyrirtækinu Reynolds American. 

• 2 blogg um fréttina

Bloggað um fréttina

• Ásgrímur Hartmannsson: Allt kókaín er lífrænt ræktað
• Sigríður Sigurðardóttir: Það að vera lífrænn!