Hús á hvolfi veldur svima

Hús sem er að öllu leyti á hvolfi var opnað gestum á þýsku eynni Usedom fyrir viku. Innanstokksmunir, stólar, teppi og borð, eru festir í loftið.

Hönnuðir hússins eru Pólverjarnir Klaudiusz Golos og Sebastian Mikiciuk, og er húsið hluti af sýningunni Edutainment („menntunarafþreying“).

„Það er engin sérstök ástæða fyrir því að við gerðum þetta hús. Okkur langaði bara til að búa til eitthvað sem væri öðru vísi,“ sagði Mikiciuk.

Ekki standi til að neinn búi í húsinu, það sé eingöngu sýningargripur.

Fjölmargir hafa þegar skoðað húsið, og segjast margir hafa fengið svima og orðið ringlaðir við að vera inni í því.

Svipuð hús hafa verið reist á Spáni og í Bandaríkjunum, en í þeim húsum eru innanstokksmunir þó ekki á hvolfi, festir í loftið, eins og í húsinu á Usedom.

• 3 blogg um fréttina

Bloggað um fréttina

• Bryndís Svavarsdóttir: Þeir eru löngu á eftir...
• Jens Sigurjónsson: Húsið veldur svima.
• Kristín Guðbjörg Snæland: Frábær hugmynd