England – bannað innan átján

Starfsmaður í vega­bréfa­eft­ir­liti á Heathrow-flug­velli í London meinaði Hilm­ari Frey Bjartþórs­syni, 16 ára knatt­spyrnu­manni frá Fá­skrúðsfirði, inn­göngu í Eng­land 12. októ­ber sl. Hilm­ar var að fara þangað til að æfa með ung­lingaliði knatt­spyrnuliðsins Rea­ding.

„Hann sagði að ég væri ekki orðinn nógu gam­all – væri ekki orðinn átján,“ sagði Hilm­ar um þessa óskemmti­legu lífs­reynslu. Hann var með gilt ís­lenskt vega­bréf í hönd­un­um. „Hann spurði hvort ég væri í fylgd ein­hvers sem væri eldri en ég. Þegar ég svaraði því neit­andi ætlaði hann ekki að hleypa mér í gegn.“

Full­trúi frá knatt­spyrnu­fé­lag­inu beið eft­ir Hilm­ari í flug­stöðinni. Hilm­ar seg­ir að þessi til­tekni starfsmaður hafi farið að leita að þeim manni en ekki fundið í fyrstu til­raun. Eins hringdi hann ein­hver sím­töl. Lög­regla var ekki kölluð til.

Sá sem var að taka á móti Hilm­ari var far­inn að halda að hann hefði ekki komið með flug­vél­inni. Hilm­ar kvaðst hafa þurft að bíða í um 45 mín­út­ur við vega­bréfa­eft­ir­litið meðan á þessu stóð. Loks náðist sam­band við full­trúa knatt­spyrnu­fé­lags­ins og þá var Hilm­ari hleypt inn í Eng­land í fylgd ör­ygg­is­varðar.

Hilm­ari gekk greiðlega að yf­ir­gefa Eng­land eft­ir níu daga dvöl og þótti þá ekki of ung­ur til að snúa aft­ur heim einn síns liðs.