Festi handlegginn í klósettinu

Farþegi í franskri hraðlest lenti í óvenjulegum hremmingum í gær. Hann missti farsímann sinn niður í salerni lestarinnar og þegar hann ætlaði að reyna að fiska hann upp opnaðist fyrir sogkerfi salernisins, handleggur mannsins sogaðist niður og stóð fastur.

Að sögn fréttavefjar BBC þurfti að stöðva lestina í tvær klukkustundir á meðan slökkviliðsmenn reyndu að losa manninn. Ekki var hægt að ná handleggnum upp úr salerninu og því þurfti að saga salernið laust. Maðurinn og salernið voru síðan borin á brott, að sögn sjónarvotta.

Þetta gerðist í lest, sem var á leið frá  La Rochelle til Bordeaux.

• 3 blogg um fréttina

Bloggað um fréttina

• Axel Jóhann Hallgrímsson: Maður og salerni verða eitt.
• Guðmundur Margeir Skúlason: Þetta hefði verið gaman að sjá!
• Adda bloggar: Festi hendi í salerni í hraðlest....................