Deilt um hafmeyjuna

Hugmyndir um að senda hina kunnu styttu Edvards Eriksens af litlu hafmeyjunni í Kaupmannahöfn til Kína eftir tvö ár eru umdeildar í Danmörku.

Litla hafmeyjan situr á steini sínum við Löngulínu og er einn helsti viðkomustaður ferðamanna sem koma til borgarinnar. Lagt hefur verið til að bronsstyttan verði fyrir miðju í danska skálanum á heimssýningunni Expo 2010 í Sjanghai. Hugmyndin kemur frá arkitektunum sem sigruðu í samkeppni um skálann.

Að sögn The Art Newspaper eru erfingjar listamannsins á móti hugmyndinni, þótt þeir ætli ekki að fara í mál til að stöðva ferðalag styttunnar. Stjórnmálaflokkurinn Dansk Folkeparti vill að málið verði tekið upp á þinginu og hyggst beita sér fyrir því að styttan verði kyrr.