Mr. Darcy enn eftirsóttur

Málverk af leikaranum Colin Firth í hlutverki Mr. Darcy hefur verið selt á 12.000 pund í uppboðshúsi í London og tvöfaldaði með því matsverð sitt.

Olíumálverkið er leikmunur úr sjónvarpsþáttunum Pride and Prejudice (Hroki og hleypidómar) sem BBC gerði árið 1995 eftir samnefndri sögu Jane Austen.

Verkinu fylgdi undirritað bréf frá hinum 48 ára Firth þar sem hann segir Mr. Darcy hafa elst betur en flestir.

„Málverkið seldist fyrir tvöfalt matsverð aðeins vegna þess að sjónvarpsþættirnir eiga sérstakan sess í hjörtum áhorfenda, sérstaklega kvenkynsins,“ segir talsmaður uppboðshússins.

Málverkið kemur við sögu í þáttunum þegar Elizabeth Bennet heimsækir Pemberley, sveitasetur Mr. Darcy.

Túlkun Firth á Mr. Darcy tryggði honum sess sem alþjóðlegs kvennagulls og þykir mörgum hann vera hinn eini sanni Darcy. Þættirnir nutu líka og njóta enn mikilla vinsælda og er atriðið þar sem Mr. Darcy gengur upp úr vatni í blautri skyrtu orðið ódauðlegt í hugum margra.