Berrassaðir á reiðhjóli
Setja bókamerki
Naktir fjallareiðhjólamenn í svissnesku kantónunni Appenzell-Innerrhoden, eiga í framtíðinni á hættu að fá sekt upp á 200 svissneska franka, eða rúmlega 19 þúsund krónur, að því er fram kemur á fréttavef Reuters.
Það hefur verið sérstaklega vinsælt meðal þýskra ferðamanna að hjóla berrassaður í svissnesku ölpunum en þetta athæfi hefur farið sérstaklega fyrir brjóstið á íbúum Appenzell-Innerrhoden kantónunnar, sem þekktir eru fyrir íhaldssaman hugsunarhátt. Kantónan er með fæsta íbúana í Sviss en þar fengu konur ekki kosningarétt fyrr en árið 1990. „Við verðum að vernda börn okkar fyrir þessari siðlausu hegðun," er haft eftir Melchior Looser, yfirmanni dóms- og lögreglumála í kantónunni.
Lögreglu tókst að grípa einn kviknakinn hjólamann glóðvolgan í september síðastliðnum. Sá var reyndar Svisslendingur, 44 ára gamall og var ákærður fyrir ósæmilega hegðun á almannafæri. Ekki er enn búið að dæma í málinu en þessi seinagangur í kerfinu hefur þrýst á stjórnvöld til að koma fram með fljótvirkari aðferð við að takast á við vandamálið.
Ekki er ljóst hvar hinir nöktu hjólreiðamenn eiga að hafa féð á sér.
Fagnar brú sem hann áður gagnrýndi
Sigldu yfir tún til að bjarga innlyksa konu
E.coli baktería greindist í neysluvatni
Hringvegurinn settur á óvissustig
Plástrameðferðir sem duga skammt
Skjálfti upp á 3,3 við Keili
