Darwin lét aðra bursta skóna sína

Í Cambridge-háskóla fundust nýlega gamlar og gleymdar skruddur frá árunum 1828-31, sem hafa m.a. að geyma skuldaregistur skólanema á þeim tíma. Þetta þykir merkilegt fyrir það að einn af nemendum skólans á þeim tíma var Charles Darwin.

Bækurnar eru sex talsins, leðurbundnar, og fræðimenn bundu strax vonir við að finna í þeim eitthvað sem gæti varpað ljósi á skólagöngu Darwins. Þeim varð að ósk sinni, því í þeim var listi yfir útgjöld vísindamannsins fræga, þar sem meðal annars kom fram að hann greiddi sótara fyrir að þrífa strompinn sinn, og öðrum fyrir skóburstun. Þá kemur einnig fram að Darwin var í reikningi bæði hjá rakara og klæðskera.