Breskar konur fá loksins sinn bjór

Tær bjór er nú væntanlegur á markað í Bretlandi í fyrsta skipti, og verður hann framleiddur sérstaklega með konur í huga. Bretar eru þekktir fyrir bjórdrykkju á pöbbnum, en það á ekki við um breskar konur, sem drekka mun minna af bjór en konur í nágrannalöndunum. Þessu vilja bjórframleiðendur breyta.

„Bjór hefur haft á sér karlmennskuímynd allt of lengi, það er erfitt að ímynda sér nokkra aðra framleiðslu þar sem 50% neytenda eru algjörlega hunsuð,“ segir Janet Street-Porter, bresk sjónvarpsstjarna sem bjórframleiðandinn Coors fékk í lið með sér til að finna út leiðir til að ná til kvenna.

Eftir að hafa kannað málið kom í ljós að breskar konur kjósa vín framyfir alla aðra áfenga drykki og innan við 10% segjast helst drekka bjór. Um helmingur þeirra segist ekki drekka bjór vegna þess að hann sé fitandi, þriðji þeirra segist heldur kjósa drykki sem séu bornir fram í fallegum glösum, hafi réttu ímyndina fyrir þær eða séu vinsælir í vinahópnum. Fram að þessu hafa breskar konur aðeins átt um 13% hlutdeild í bjórsölu, miðað við 25% í Bandaríkjunum og 36% í Írlandi.

Margar konur virðast afhuga bjór vegna þess að hann er mattur og froðan þykk, þótt þeim finnist bragðið í sjálfu sér gott. Coors bjórframleiðandinn hyggst því verða sá fyrsti í Bretlandi til að framleiða léttan, tæran bjór með konur sem markhóp. Hann verður settur á markað í sumar en hefur enn ekki hlotið nafn.

• 1 blogg um fréttina

Bloggað um fréttina

• Einar B Bragason : Breskar konur fá loksins sinn bjór og nafnið maður nafnið!