Lækkuðu mann svo hann passaði í líkkistu

Lögreglan í Allendale, í Suður-Karólínu í Bandaríkjunum, rannsakar hvort útfararheimili hafi gripið til þeirra örþrifaráða að skera burt hluta af fótleggjum manns sem var of hávaxinn til að passa í líkkistuna.

Fyrrverandi starfsmaður útfararheimilisins kom nýlega fram og sagði að eftir að James Hines lést árið 2004 hafi komið í ljós að hann passaði ekki í kistur útfararheimilisins. Því hafi verið brugðið á það ráð að minnka hann um nokkra sentímetra. Hines var 1,96 m á hæð.

Lík Hines var grafið upp í fyrradag og kom þá ýmislegt í ljós, þó lögreglan vilji ekki gefa upp hvað það var. Réttarlæknir hefur skoðað líkið og sent málið áfram til lögreglunnar sem lítur það alvarlegum augum.

Reynt var að ná í starfsmann útfararheimilisins en hann vildi engu svara. Ruth Hines, ekkja James Hines, segir málið reyna mikið á hana. „Ég er ganga í gegnum töluvert. Þetta er eins og að byrja að syrgja alveg upp á nýtt og nú er ég sár og dofin.“ Hún segir að skömmu eftir að eiginmaðurinn lést hafi hún spurt útfararstjórann hvort kistan væri  nógu löng og hann sannfærði hana um að svo væri.

• 4 blogg um fréttina

Bloggað um fréttina

• Riddarinn : Sise does matter.
• Ásgrímur Hartmannsson: Þessi frétt minnir mig á kvikmynd...
• Oddur Helgi Halldórsson: Var hann ekki styttur
• Jón Páll Ásgeirsson: Styttur