Ufsi veldur kinnroða meðal enskra neytenda

Breska verslunarkeðjan Sainsbury hefur ákveðið að selja ufsa undir heitinu „colin" (borið fram co-lan) í stað pollack þar sem pollack er borið fram á svipaðan hátt og slanguryrði yfir eistu í enskri tungu. Telja forsvarsmenn keðjunnar að þannig verði hægt að komast hjá því að viðskiptavinir keðjunnar fái roða í kinnar er þeir óska eftir fisknum á diskinn sinn. Segja þeir að nokkuð hafi borið á því að viðskiptavinir hafi hætt við að kaupa fiskinn út af nafninu.

Ufsinn (pollack) verður seldur í sérstökum umbúðum sem eru hannaðar undir áhrifum bandaríska listamannsins Jackson Pollock. Sainsbury vill með þessu auka sölu á ufsa en hann hefur orðið undir í samkeppninni við ýsu og þorsk í verslunum keðjunnar.

• 2 blogg um fréttina

Bloggað um fréttina

• Ómar Ragnarsson: Hvað eigum við að kalla hrútspungana ?
• Níels A. Ársælsson.: Pollachius virens