Ráðagóður kráreigandi

Veitingakona í Bretlandi hefur fundið gloppu í bresku reykingarlöggjöfinni og opnað „rannsóknarmiðstöð fyrir reykingamenn“ á kránni sem hún á og rekur. Þar geta kráargestir reykt án þess að gerast brotlegir við lög.

Það eina sem gestir Cutting Edge öldurhússins í Barnsley verða að gera er að fylla út spurningalista. Þar eiga þeir að svara spurningum sem snerta reykingavenjur þeirra. Með því að gera þetta mega gestirnir löglega kveikja sér í sígarettu á kránni, eða öllu heldur rannsóknarmiðstöðinni.

Árið 2007 tóku í gildi lög sem banna reykingar innandyra á opinberum stöðum á Englandi og í Wales. Það leiddi til mikils samdráttar í bjórsölu og á síðasta ári lokuðu yfir 2.000 krár í landinu.

Veitingakonan Kerry Fenton opnaði miðstöðina fyrir fimm dögum, en um er að ræða herbergi sem er til hliðar við kránna.

„Viðskiptin hafa tekið við sér og þetta er allt gert í nafni vísindanna, er löglegt og á yfirborðinu,“ sagði hún í samtali við breska götublaðið Sun. „Ég reyki ekki en ég trúi á einstaklingsfrelsið.“

Það var einn af fastakúnnum Cutting Edge sem kom auga á gloppuna. 

Borgarráð Barnsley segist hins vegar ætla að sjá til þess að reykingabanninu verði framfylgt.

• 5 blogg um fréttina

Bloggað um fréttina

• Jenný Anna Baldursdóttir: Grúskítugu börnin hennar Evu
• Hörður Halldórsson: Rannsóknarmiðstöð ??? jóla...hvað
• Guðmundur Fannar Kristjánsson: Bretinn lætur sér ekki segjast!!
• Axel Jóhann Hallgrímsson: Neyðin kennir.....
• Baldur Sigurðarson: Heimskulegt þó ekki sé meira sagt.