Rýming vegna óþefs

Rýma þurfti símasvörunarfyrirtæki í Kaliforníu nýverið vegna óþefs og flytja þurfti sjö starfsmenn á sjúkrahús eftir að starfsmaður fyrirtækisins tók sig til og reyndi að þrífa ísskápinn á staðnum.

Fnykurinn af rotnandi matvælum var svo mikill að slökkviliðsmenn þurftu að rýma byggingu AT&T í miðborg San Jose, samkvæmt frétt San Jose Mercury.

Sjö voru fluttir á sjúkrahús og 28 veiktust eftir að starfsmaður tók sig til og ákvað að opna ísskápinn og þrífa hann með tveimur tegundum  hreinlætisefna. Þegar lyktin af hreinlætisefnunum blandaðist saman við þefinn af rotnandi matvælum varð uppi fótur og fit á skrifstofunni og ældu margir og kúguðust inni á skrifstofunni.

Slökkviliðsstjórinn í San Jose, Barry Stallard, segist ekki vita hvað það var sem hafði gleymst í ísskápnum en lyktin hafi minnt á rotnandi kjöt.

• 1 blogg um fréttina

Bloggað um fréttina

• Axel Jóhann Hallgrímsson: Vantaði viðvörun framleiðanda?