Át „byssuna“ áður en löggan kom

Bandarískur unglingspiltur gerði tilraun til ráns á netkaffihúsi vopnaður banana. Hann át „vopnið" áður en lögregla kom á staðinn og handtók hann.

Hinn 17 ára gamli John Szwalla kom inn á netkaffihús í bænum Winston -Salem í Norður-Karólínu, með banana falinn undir stuttermabolnum sínum. Hann heimtaði peninga og sagðist vera með byssu, að því er fram kemur í frétt BBC. Eigandi og gestir á staðnum yfirbuguðu hinn ógæfusama þjóf og hringdu eftir aðstoð laganna varða. Unglingurinn át hins vegar „vopnið" áður en lögreglan birtist.

Lögreglumennirnir göntuðust með að þeir myndu ef til vill ákæra piltinn fyrir að eyðileggja sönnunargögn. Eigandi netkaffihússins, Bobby Ray Mabe, sagði við fjölmiðla að lögreglan hefði í staðinn tekið myndir af bananahýðinu.

„Ef strákurinn hefði verið með byssu hefði hann skotið mig," sagði Mabe við dagblað í bænum. „En hann var með banana."

Unglingurinn hefur verið ákærður fyrir tilraun til vopnaðs ráns.

• 2 blogg um fréttina

Bloggað um fréttina

• Jón Snæbjörnsson: gerði tilraun til ráns á netkaffihúsi vopnaður banana
• Ómar Ragnarsson: "Sá á ekki að stela..."