Ómannúðleg meðferð á gullfiskum

Dómstóll í Danmörku hefur fundið ritstjóra sjónvarpsþáttarins Kontant, sem sýndur er í danska ríkissjónvarpinu, sekan um ómannúðlega meðferð á dýrum en blaðamenn þáttarins helltu sjampói í gullfiskabúr til að sýna fram á að eiturefni væru í sápunni.   

Þátturinn fjallaði um hættulegar hárvörur. Fréttamennirnir vildu sýna fram á hve flösusjampó, sem inniheldur efnið zinkpyrithion, væri hættulegt og þeir helltu því smávegis af sjampói í gullfiskabúr. 

Eftir þrjá daga höfðu 12 af 13 fiskum í kerinu drepist.  Rannsóknin leiddi til umræðu um notkun hættulegra efna í hárvörum en margir dýravinir brugðust einnig ókvæða við. Dýralæknir kærði Lisbeth  Kølster, ritstjóra þáttarins, til lögreglu. 

Rannsókn málsins tók 2 ár og síðan var málið tvö ár að velkjast í danska dómskerfinu en nú hefur héraðsdómur í Glostrup fundið  Kølster seka. En vegna þess hve málsmeðferðin tafðist ákvað rétturinn að fresta refsingunni.

Rétturinn lagði til grundvallar, að blaðamenn danska ríkisútvarpsins hafi vitað fyrirfram, að fiskarnir myndu drepast.   

• 1 blogg um fréttina

Bloggað um fréttina

• fingurbjorg: Vitleysisgangur