Veröld/Fólk | Veraldarfréttir | mbl | 29.5.2009 | 8:06 | Uppfært 9:07

Knúsin tímatakmörkuð

Faðmlög eru nýtt sem tjáningarform við ýmsar aðstæður mbl.is/Ómar

Skólayfirvöld í nokkrum ríkjum Bandaríkjanna íhuga nú að setja reglur um snertingu á skólalóðum. Á undanförnum árum hefur færst mjög í vöxt að nemendur heilsist og kveðjist með faðmlögum og þykir nú skólayfirvöldum víða nóg um. Þetta kemur fram á fréttavef Jyllands-Posten.

Reglur um faðmlög hafa þegar verið settar í skólum í Oregon, New Jersey og Connecticut samkvæmt heimildum New York Times. Eru þau annað hvort bönnuð á skólalóðinni eða takmörkuð við þrjár sekúndur.

„Líkamssnerting er mjög viðkvæmt mál,” segir Noreen Hajinlian, sem starfar við George G. White skólann í Hillsdale í New Jersey. „Það var allt of mikið um ónauðsynleg faðmlög. Þetta var á göngunum áður en nemendur fóru í tíma. Þetta var ekki bara þegar fólk heilsaðist og kvaddi. Þetta stóð yfir allan daginn.”

„Ef einhver faðmar ekki aðra, það er að segja knúsar aldrei neinn, þá verður fólk svolítið meðvitað um það,” segir Gabrielle Brown, nemandi við Fiorello H. LaGuardia High School á Manhattan í New York. „Fólki finnst það skrýtið og sérvitringslegt.”