Vill banna Kók Zero

Ríkisstjórn Venesúela fór fram á það í gær við bandaríska gosdrykkjarframleiðandann Coca Cola að allir Coke Zero drykkir í landinu verði innkallaðir úr verslunum. Yfirvöld halda því fram að drykkurinn sé skaðlegur heilsu fólks.

Ákvörðun stjórnvalda kemur í kjölfar þess að fjölmörg fyrirtæki í landinu hafa verið þjóðnýtt og þá er verið að skoða fjölmörg fyrirtæki ofan í kjölinn. 

Jesus Mantilla, heilbrigðisráðherra landsins, segir að það eigi að hætta að selja gosdrykkinn, sem er sagður innhalda engar hitaeiningar. Þá segir hann að fjarlægja skuli drykkina úr öllum verslunum á meðan málið er í rannsókn.

„Það á að fjarlægja vöruna til að vernda heilsu Venesúelamanna,“ sagði Mantilla.

Talsmenn Coca Cola segja hins vegar að engin skaðleg efni sé að finna í drykknum. Þrátt fyrir það verði framleiðslan stöðvuð og varan fjarlægð úr verslunum á meðan yfirvöld skoða málið.

• 2 blogg um fréttina

Bloggað um fréttina

• Hrappur Ófeigsson: Aspartame
• Katrín G E: Hélt að hjartað gæfi sig