Lögreglan vill stöðva þuklara

Lögreglan í Tókýó í Japan hefur skorið upp herör gegn hópi manna sem þreifa á og þukla á fólki, þó aðallega konum, í farþegalestum. Um sérstakt átak lögreglunnar er að ræða og stendur það í eina viku.

Lögreglumenn í dulargervi verða staðsettir í lestum í þeim tilgangi að standa þuklara að verki í þéttsetnum lestum.

Rúmlega 6.000 manns voru handtekin í fyrra grunuð um að hafa káfað á fólki eða tekið ljósmyndir af því í heimildarleysi.

Kannanir hafa sýnt fram á að rúmlega tvær af hverjum þremur ungum konum hafi orðið fyrir barðinu á slíkri hegðun. Til að sporna við slíku athæfi hafa lestarfyrirtæki kynnt til sögunnar lestarvagna sem eru einvörðungu ætlaðir konum.

Þeir sem gerast sekir um þukl eða káf geta átt von á því að verða dæmdir í sjö ára fangelsi.

Fréttir herma að lögreglan hafi sérstakar áhyggjur af því að brotamennirnir noti netið til að skipuleggja sig, og hafi þannig myndað hópa.

• 3 blogg um fréttina

Bloggað um fréttina

• Ólafur Gíslason: Lögreglan er að þreifa fyrir sér með nýju átaki
• Svanur Gísli Þorkelsson: Af káfi japanskra karlmanna
• Jón Snæbjörnsson: Skrítnir í Japan