Elstu klámbúð heims lokað

Eitt sinn var verslunin Blue Movie við Vesterbrogade í Kaupmannahöfn stærsta klámbúð heims. Nú hefur verið tekin ákvörðun um að loka versluninni því það er ekki lengur arðbært að höndla með þessar vörur. 

Blaðið Berlingske Tidende fjallar með nokkurri eftirsjá um Blue Movie í dag og segir að hluti af menningararfi heimsins sé að hverfa þegar búðinni verður lokað 31. mars.  Blaðið segir, að svo best sé vitað sé verslunin elsta klámbúð heims og hefur verið rekin í 45 ár. Frá árinu 1972 hefur verslunin verið til húsa í   Vesterbrogade 98.

Verslunin hefur alla tíð verið í eigu sömu fjölskyldunnar og núverandi eigandi, Jesper Strauss, tók við rekstrinum af föður sínum. Hann segir við Berlingske, að öll fjölskyldan hafi afgreitt í versluninni og sjálfur hafi hann starfað þar alla tíð. Því sé þessi niðurstaða afar sorgleg.

Blaðið segir, að netið, fjármálakreppan, hininhá húsaleiga og reiðhjólastígar hafi stuðlað að því að verslunin bar sig ekki lengur. Strauss segir, að viðskiptavinirnir geti ekki lengur lagt bílum í nágrenni verslunarinnar vegna þess að búið sé að leggja reiðhjólastíga um allt.

Strauss segir við Berlingske, að ef danska þjóðminjasafnið hafi áhuga á einhverjum munum húsbúnaði úr versluninni sé því meira en velkomið að fá e.t.v. nokkra bása þar sem viðskiptavinir geta horft á myndbönd. Safnið er m.a. með hasssöluborð frá Puscher Street í Kristjaníu í sýningarsal sínum. 

• 1 blogg um fréttina

Bloggað um fréttina

• Gísli Foster Hjartarson: Hugmynd fyrir Byggðasafn Vestmannaeyja