Kínverjar byggja súkkulaðiland

Iðnaðarmenn í Peking eru að leggja lokahönd á 20 þúsund fermetra „súkkulaði-ævintýraland“ sem áætlað er að opni almenningi í lok þessa mánaðar. Um er að ræða fimm svæði innandyra og tvö utandýra, með mannháum styttum af fornum kínverskum bardagamönnum og eftirlíkingum af hlutum Kínamúrsins - allt að sjálfsögðu úr súkkulaði.

„Þótt súkkulaði sé ekki jafn vinsælt í Kína og í hinum vestræna heimi, vonumst við til að þetta verði til að auka áhugann á súkkulaði í Kína,“ sagði Zheng Yaoting, forstjóri fyrirtækisins sem rekur súkkulaðilandið, í samtali við Global Times.

Bráðnar í apríl

Börnum verður einnig boðið að spreyta sig í súkkulaðigerð, segja skipuleggjendur verkefnisins sem vonast til að hægt verði að laða að milljón gesti áður en landinu verður lokað í apríl, en þá verður lofthiti orðinn það mikill í Peking að líkur eru á að súkkulaðið bráðni. 

Súkkulaðilandið verður opnað aftur í janúar á næsta ári, og þarf að endurbyggja það frá grunni enda væntanlega ekki mikið heilt eftir eftir sumarið. 

Frá Peking í Kína Reuters

• 3 blogg um fréttina

Bloggað um fréttina

• Gísli Foster Hjartarson: Land fyrir nammigrísi!!
• Kristbjörg Erla Hreinsdóttir: Girnilegt ferðalag í Kína
• Jakob Falur Kristinsson: Súkkulaðiland