Hálfnaktar konur mótmæla í Úkraínu

Fjórar ungar konur, berar að ofan, ruddust inn á kjörstað í Kænugarði í Úkraínu í dag og vildu mótmæla skorti á lýðræði í landinu. Síðari umferð forsetakosninga stendur nú yfir í Úkraínu þar sem kosið er á milli Julíu Timosjenkó og Viktors Janúkóvítsj.

Konurnar, sem eru félagar í samtökum femínista, sem nefnast Femen, ruddust inn á kjörstaðinn skömmu áður en til stóð að Janúkóvítsj kæmi þangað til að kjósa. Umrædd samtök hafa vakið athygli á sér í Úkraínu fyrir óvenjulegar mótmælaaðgerðir.

„Hættið að nauðga lýðræðinu," hrópuðu konurnar. Þær héldu á spjöldum þar sem m.a. stóð: Hjálp! Nauðgun! Þær voru aðeins klæddar í gallabuxur og með grænt límband yfir brjóstvörtunum.   

Konurnar sögðu við blaðamenn að þær væru að mótmæla endalokum lýðræðis í Úkraínu og þau mótmæli beindust ekki sérstaklega að forsetaframbjóðendunum.   

Félagar í Femen eru flestir háskólanemar. Femen-konur vöktu alþjóðlega athygli í sumar þegar þær stóðu fyrir mótmælum gegn kynlífsiðnaði í Úkraínu í miðborg Kænugarðs.

• 4 blogg um fréttina

Bloggað um fréttina

• Axel Jóhann Hallgrímsson: Virkar þetta?
• Gunnar Th. Gunnarsson: Áfram Sóley!
• Jón Aðalsteinn Jónsson: Fer ekki að vora
• Einhver Ágúst: Glæsilegar!!