Krans gerði skyndiárás

Myndskeið sem sýnir stærðarinnar krans falla á höfuðið á Viktor Janúkóvítsj, forseta Úkraínu, hefur farið sem eldur um sinu á netinu. Málið þykir vandræðalegt og það varð enn vandræðalegra þegar ásakanir fóru að berast þess efnis að forsetinn hafi reynt að koma í veg fyrir birtinguna.

Atvikið átti sér stað í gær þegar Janúkóvítsj var viðstaddur minningarathöfn um þá sem hafa fallið í stríði. Dímítrí Medvedev, forseti Rússlands, var jafnframt viðstaddur athöfnina, en Medvedev var í opinberri heimsókn í Úkraínu.

Slagveður gerði umræddan dag og um leið og Janúkóvítsj beygði sig fyrir framan kransinn þá fauk hann um koll. Hann hæfði forsetann beint í höfuðið.

Forsetinn stóð einsamall þegar þetta gerðist, en nokkrir aðstoðarmanna hans ruku til þegar þeir sáu hvað hafði gerst. Kransinn var settur aftur á sinn stað, og á meðan lagaði forsetinn á sér hárið. Hann virtist nokkuð ringlaður eftir höggið.

Tugir þúsunda hafa nú þegar horft á myndskeiðið á YouTube.

• 1 blogg um fréttina

Bloggað um fréttina

• Börkur Hrólfsson: Fréttin fyrir neðan