Ólétt eða feit? Bretar vita ekki svarið

Um 85% óléttra kvenna í Bretlandi þurfa oft að standa þegar þær nota almenningssamgöngur, því fólk víkur ekki úr sæti fyrir þeim eins og kurteisisreglur kveða þó á um. Getgátur eru uppi um að annars konar kurteisi þvælist fyrir farþegum, þeir átti sig nefnilega ekki á því hvort konur séu óléttar eða einfaldlega feitar, og kjósa því að hafa sig hæga.

Það var könnun á vefsíðunni Gurgle.com, á vegum bresku samtakanna Mothercare, sem leiddi í ljós að 84% kvenna óléttra kvenna segja engan standa upp fyrir sér um borð í lestum eða strætisvögnum. Og skyldi engan undra, því það getur verið stórhættulegt að ætla að draga ályktanir um líkamlegt ástand kvenna á opinberum vettvangi.

BBC segir að þótt flestir farþegar vilji vera kurteisir sé það ekki eins einfalt og það virðist. Er konan ólétt, eða er hún bara feit eða í peysu sem gúlpar? Þótt það sé leiðinlegt að vera sá farþegi sem sýnir óléttu konunni ókurteisi óttast flestir enn meira að segja upphátt við konu, innan um fjölda ókunnugra, að maginn á henni sé svo stór að hún hljóti að vera ólétt. Tilhugsunin um hversu vandræðalegt þetta yrði gerir það að verkum að meirihluti farþega segir ekkert og lætur konuna um að standa, óléttri eður ei.  

Til að reyna að greiða úr þessu flókna félagslega vandamáli bjóða Mothercare samtökin nú til sölu barmmerki sem á stendur „Barn um borð". BBC birtir auk þess nokkur atriði sem ringlaðir farþegar almenningssamganga geta haft í huga til að forðast svona misskilning með því að greina líkamsástandið rétt.

Atriði sem benda til þess að konan sé sennilega ólétt, en ekki bara feit, eru til dæmis bólgnir fætur, más og blás, vaggandi göngulag og ef konan nuddar reglulega á sér bakið eða bumbuna.

• 1 blogg um fréttina

Bloggað um fréttina

• Haukur Baukur: Óttinn við að rugga bátnum