Heimsins stærsta kaka að falli komin

Kökuturn sem átti að verða stærsta kaka heims, 7,82 metrar á hæð, entist einungis í einn dag. Það var ekki vegna þess hversu sælkerar voru sólgnir í hana sem hún féll heldur hitabylgja í Parísarborg.

Það var því útlit fyrir að rífa þyrfti turn án hungurs, Tour sans Faim, í kvöld þar sem turninn minnti mest á skakka turninn í Písa en nokkuð annað. Enda hefur verið heitt í París í dag, yfir þrjátíu stig í forsælu, og kakan frekar lin og óstöðug, að sögn byggingameistaranna.

Matreiðslumeistarinn Gilles Stassart og arkitektinn Jean Bocabeille fengu til liðs við sig, kökugerðarmenn, arkitekta, verkfræðinga og sérfræðinga á ýmsum sviðum til þess að byggja stærstu köku í heimi sem þeir vonuðust til að kæmist í Heimsmetabók Guinness.

Kakan var sýnd opinberlega Cite de l'Architecture í gær og átti hún að endast í fjóra daga. Til allrar lukku komu starfsmenn frá Guinness til að meta kökuna strax í gær  þannig að hún ætti að komast í bókina góðu.

Alls voru notuð 628 kg af hveiti, 508 kg af sykri, 350 egg og 18 kg af smjöri í kökuna.