Hundurinn læsti bílnum

Lögreglan í Borgarfirði þurfti um helgina að aðstoða menn, sem komust ekki inn í bíl sinn. Ferfættur farþegi, hundur af chihuahua-kyni, hafði læst bílnum og komust mennirnir ekki inn.

Fram kemur á vef Skessuhorns, að lögreglan hafi fengið tilkynningu um að tveir menn væru í hörku deilum og létu ófriðlega utan við fólksbíl við þjóðveginn sunnan Hafnarfjalls.

Segir á vefnum, að lögreglan hafi farið á staðinn og þá kom í ljós að mennirnir tveir voru læstir úti og farþegi í bílnum neitaði að opna og setti bara upp hundshaus, sama hvar þeir skömmuðust í honum.

Lögreglunni tókst að opna bílinn og hleypa farþeganum út sem gelti þá án afláts enda feginn að komast út.  „Komnar voru á fullar sættir á milli aðila þegar lögreglan yfirgaf vettvanginn," segir Skessuhorn.

Skessuhorn

• 3 blogg um fréttina

Bloggað um fréttina

• Hólmfríður Bjarnadóttir: Chihuahua hundar eru nokkuð sjálfstæðir
• Sigríður Sigurðardóttir: Argaþras, hávaði og..
• Ómar Ragnarsson: Hundur var félagsmálaráðherra.