Ítalir vilja eigna sér Pál

Ítalskir fjölmiðlar, sem gátu litlu fagnað á meðal ítalska landsliðið var með á heimsmeistaramótinu í knattspyrnu, vilja nú slá eign sinni á kolkrabbann Pál, sem hefur spáð rétt fyrir um úrslit í leikjum á HM. Þjálfari dýrsins upplýsti nefnilega í  dag að Páll hefði veiðst í ítalskri lögsögu. 

„Kolkrabbinn heitir Paolo," segir íþróttablaðið Tuttosport í dag. 

Blaðið Il Corriere della Sera segir, að þetta sé smá sárabót í lok heimsmeistaramóts sem hafi fært Ítölum litla gleði. Ítalska liðið komst ekki upp úr riðlakeppninni.  

Verena Bartsch, þjálfari Páls, sagði í viðtali við þýska blaðið Bild í dag, að hún hefði fangað hann í apríl sl. undan ítölsku eyjunni Elbu. Hann hefði þá verið fjögurra vikna gamall. 

Þetta stangast á við opinbera ævisögu Páls, sem sædýrasafnið í  Oberhausen í Þýskalandi hefur gefið út. Samkvæmt henni er Páll tveggja og hálfs árs og kom upphaflega frá Weymouth á Englandi. 

Páll hefur spáð rétt fyrir um leiki Þýskalands á HM til þessa, þar á meðal að þeir myndu tapa fyrir Spáni í undanúrslitum, sem hann fékk litla þökk fyrir. Hann hefur einnig spáð fyrir um úrslitaleikinn í kvöld og sagði, með því að sækja sér skel í kassa merktan Spáni, að Spánverjar verði heimsmeistarar. 

• 1 blogg um fréttina

Bloggað um fréttina

• Haraldur Haraldsson: Ítalir vilja eigna sér Pál/ vilja fá eitthvað fyrir getuleysið …