Tvöhundruð ára eðalvín

Kampavínsflöskur sem kafarar fundu á botni Eystrasaltsins nýverið geyma fyrirtaks kampavín þótt það sé reyndar komið til ára sinna. Af merkimiðum á flöskunum að dæma mun vínið hafa verið bruggað á árunum 1782-1789 og er því um 230 ára gamalt.

Sænskir kafarar fundu 30 flöskur af kampavíninu, sem er að öllum líkindum af gerðinni Veuve Clicquot, á 55 metra dýpi. Vínsérfræðingur sem þegar hefur smakkað vínið segir það vel drykkjarhæft og reynist spár um aldur réttar er þetta elsta drykkjarhæfa kampavín í heimi.

Flöskurnar fundust á Álandseyjum sem eru miðja vegu milli Svíþjóðar og Finnlands. Álandseyjar eru með eigin stjórn en landsvæðið telst þó til Finnlands.

Ekki hefur enn verið gefið upp nákvæmlega hvar hið aldna kampavín fannst, en stjórn Álandseyja kemur saman á mánudag til að skera úr um hver telst eigandi vínsins.

Flöskurnar eru taldar geta verið tugmilljóna króna virði.

• 1 blogg um fréttina

Bloggað um fréttina

• Hecademus: Gjöf til Péturs hins mikla?