Lögreglan rannsakar fallhlífarstökk asna

Lögregla í Rússlandi rannsakar nú hvernig á því stóð, að asni var látinn svífa í fallhlíf yfir ströndum Azovhafs í suðurhluta landsins í síðustu viku.

Að sögn sjónarvotta hrein asninn af hræðslu þar sem hann sveif yfir höfðum furðu lostinna baðstrandargesta í þorpinu Golubtskaja. 

Lögreglumaður í þorpinu segir, að líklega hafi verið um að ræða auglýsingabrellu nokkurra rússneskra athafnamanna, sem vildu vekja athygli á einkabaðströnd sinni. 

Þess í stað vöktu þeir athygli lögreglunnar sem nú rannsakar málið. 

„Asninn hrein og börnin grétu," sagði Larisa Tútsjkova, talsmaður lögreglunnar. „Engum datt í hug að kalla á lögregluna." Þess í stað greip fólk til myndavéla sinna og hringdi í hrönnum í bæjarblaðið, sem nefnist Taman.

„Hann flaug svo hátt að börnin á ströndinni grétu og spurðu foreldra sína: Hvers vegna bundu þeir hvutta við fallhlíf," sagði blaðið. „Asninn lenti svo með grimmilegum hætti en hann dróst með fallhlífinni í sjónum. Dýrinu var síðan dröslað hálfdauðu í land."  

Elena Iovleva, ritstjóri Taman, segir að þetta mál hafi vakið mikla athygli þótt slæm meðferð á dýrum þyki ekki tiltökumál í Rússlandi. Myndir af asnanum voru sýndar í rússneskum sjónvarpsstöðvum í dag.  

Myndir af flugi asnans birtust á YouTube

• 2 blogg um fréttina

Bloggað um fréttina

• Sigurður Haraldsson: Hvur Grefillinn.
• Axel Jóhann Hallgrímsson: Asnar og aðrir asnar