Þingmenn vopnaðir skóm og blómapottum

Yfir 60 þingmönnum á löggjafarþingi indverska ríkisins Bihar var vikið tímabundið af þingi eftir að mikill slagur braust út í þingsalnum. Þingmenn köstuðu skóm í þingforsetann og öryggisverðir fjarlægðu eina þingkonuna, sem notaði blómapotta sem kastvopn.

Mikill órói hefur verið í þinginu undanfarna daga en þingmenn hafa krafist þess að forsætisráðherra ríkisins segi af sér vegna spillingarmála. 

Í gær sauð síðan upp úr þegar fylkingum þingmanna lenti saman. Var þar ýmsum vopnum beitt, svo sem stólum og sessum. Í morgun héldu áflogin áfram og kastaði einn þingmaðurinn m.a. skónum sínum í þingforsetann og aðrir veltust um á gólfinu í fangbrögðum. 

Þingkonunni Jyoti Singh mislíkaði svo að vera vísað út úr þingsalnum að hún greip blómapotta í anddyrinu og kastaði þeim í öryggisverði. Þrír kvenkyns öryggisverðir drógu hana á endanum á brott.

Udai Narain Choudhry, þingforseti, vék í kjölfarið 67 þingmönnum - nánast allri stjórnarandstöðunni - af þinginu þar til núverandi þingi lýkur á föstudag.

• 2 blogg um fréttina

Bloggað um fréttina

• Hecademus: Stjórnarandstaðan rekinn
• Brynjar Jóhannsson: Frumvarp á hinu Íslenska alþingi.