Níræð og sátt við fallhlífarstökkið sitt

Alfhild Gallis er sennilega elsta konan í Noregi sem stokkið hefur í fallhlíf, að sögn fréttavefjarins ABC-nyheter. Hún er níræð og stökk um helgina úr fjögurra kílómetra hæð yfir Jarlsberg-flugvellinum við Tönsberg.

Hún lét sig fyrst falla frítt niður í 2,5 kílómetra hæð en opnaði þá fallhlífina. „Þetta er það skemmtilegasta sem ég hef nokkru sinni fengið að gera,“ sagði Gallis ljómandi af ánægju þegar hún hitti barnabörnin og barnabarnabörnin á vellinum eftir stökkið. „Hvílíkt útsýni! Landið okkar er stórkostlegt og við verðum að fara vel með það.“