Ólétt nunna bönnuð í auglýsingu

Auglýsing sem sýndi þungaða nunnu borða rjómaís með skeið inni í kirkju, hefur verið bönnuð í Bretlandi. Eftirlitsstofnun með auglýsingum í Bretlandi (ASA) segir auglýsinguna gera lítið úr kaþólskri trú. Ísframleiðandinn, Antonio Federici, hótar því nú að hengja upp svipuð auglýsingaplaköt í London fyrir heimsókn páfa.  

Benedikt XVI páfi heimsækir Westminster Abbey á föstudag og predikar við messu í Westminster dómkirkjunni á laugardag. Breski ísframleiðandinn Antonio Federici vilja ekki gefa uppi hvers konar mynd verði á auglýsingaplakötunum sem hengd verði upp, en segja að "haldið verði áfram með sama þema".

Talsmaður fyrirtækisins segir að nýja myndin muni ögra banni eftirlitsstofnunarinnar. "Við vinnum nú að því að tryggja okkur auglýsingapláss á röð skilta meðfram leiðinni sem fylking páfa fer um Westminster dómkirkjuna," hefur BBC eftir henni.

ASA eftirlitsstofnunin bannaði aðra auglýsingu frá Antonio Federici í júlí 2009, en á henni sáust prestur og nunna sem virtust vera í þann mund að kyssast.

• 3 blogg um fréttina

Bloggað um fréttina

• Sigurður Sigurðsson: Kaþólsk þolinmæði.
• Jón Pétur Líndal: Hvað má þá vesalings nunnan gera?
• Sigurður Haraldsson: María var mey.