Reyndu að bora sig niður í bankahvelfinguna

Lögreglan í Albaníu handtók í dag tvo karlmenn sem reyndu að brjótast inn í banka í Tirana, höfuðborg landsins. Mennirnir leigðu sér íbúð fyrir ofan bankann og gerðu tilraun til að bora sig niður inn í bankahvelfinguna.

Þykir málið minna nokkuð á söguþráð kvikmyndarinnar Small Time Crooks eftir Woody Allen. Hávaðinn frá bornum leiddi til þess að lögreglunni var gert viðvart. 

Tonin Vocaj, lögreglustjórinn í Tirana, segir að lögreglan hafi beðið átekta og látið loks til skarar skríða þegar bófarnir voru við það að ljúka við að bora göngin.  

Vopnuðum ránum hefur fjölgað mjög í höfuðborginni, en ræningjarnir einblína þá á lítil bankaútibú þar sem öryggisgæsla er lítil.

• 1 blogg um fréttina

Bloggað um fréttina

• Hörður Halldórsson: Hresst upp á fjárhaginn.