Heldur að hún sé hross

Regina Mayer, 14 ára stúlka í Þýskalandi, gafst ekki upp þegar foreldrar hennar neituðu að gefa henni hest. Hún greip þá til þess ráðs að temja kú til að láta reiðmennskudraum sinn rætast.

Mayer vekur mikla athygli þegar hún ríður kúnni Lúnu um sveit í grennd við þorpið Laufen, nálægt landamærunum að Austurríki. Þær stökkva einnig yfir hindranir úr bjórkössum og trjábolum.

„Hún heldur að hún sé hestur,“ segir Mayer og kveðst hafa byrjað að þjálfa kúna fyrir tveimur árum.